لو نويت
يا حبيبي لو نويتْ في يومْ تِسافرْ
أو نويتْ لبْلادْ غريبهْ بجد تهاجرْ,
خودْ معاكْ شمس
النهارْ خود معاكِ البدرْ
خودْ معاكْ ضيّ النُجومْ والسَما والبحرْ,
خودْ معاكْ كلّ حاجهْ بسِّ سيبْ لي الصَّبْرْ.
يا حبيبي لو شقيتْ في احْضانْ بِلادكْ,
نارْ بلادكْ لسَّه أرحمْ من بِعادكْ,
يا حبيبي الأرضِ محتاجهْ لْجُهودكْ,
ليه تِسيبْها وِهيَّه محتاجهُ لْصُمودكْ
بسِّ لوْ قلبكْ خلاص قرَّر يسافرْ,
والكلامْ معدشِ ينفعْ راحْ تهاجرْ,
خودْ معاكْ شمس النهارْ خود معاكِ البدرْ
خودْ معاكْ ضيّ النُجومْ والسَما والبحرْ,
خودْ معاكْ كلّ حاجهْ بسِّ سيبْ لي الصَّبْرْ.
يا حبيبي مهما روحْنا وْمهما جينا,
دمْ بلادنا برضو رايحْ يجري فينا,
هيَّه روحنا وانْ بكتْ فيها عينينا,
مستحيلْ يرخصْ تُرابها فْي يومْ علينا.
بسِّ لو قلبكْ خلاصْ قرَّر يسافرْ
والكلامْ معدشِ ينفعْ راحْ تهاجر
خودْ معاكْ شمس النهارْ خود معاكِ البدرْ
خودْ معاكْ ضيّ النُجومْ والسَما والبحرْ
خودْ معاكْ كلّ حاجهْ بسِّ سيبْ لي الصَّبْرْ
د. أسامه مصاروه
ليست هناك تعليقات:
إرسال تعليق