قصيدة بالعامية اللبنانية بعنوان "عيونك"
عيونك بليلة حب مجنوني
صوبك بعتم الليل شدوني
وتحت العريشة قبالة الشباك
هونيك فوق البير حطوني
حامل بإيدي لفة التنباك
ومتل البحر يتلاطموا ظنوني
وطلعت حتى إلمح محياك
وأشواق حادي الحب يحدوني
وفجأة ظهرتي بحسنك الفتاك
والشال فوق الراس ليموني
بوجهك وميتي تسألي شو باك
وزاغوا عا برمة وجهك عيوني
وصاروا بسرعة يبرمو الأفلاك
عناقيدك من بعيد سكروني
ويا ما فتنتي بالهوى نساك
جحدو برب ال قلها كوني
ما احلى جمالك يا قمر محلاك
روحي بحلاك كتير مفتوني
رب السما كل الحسن اعطاك
جمل خصالك زود الموني
ومن مقلع الجنة بوقت سواك
بطينة بعطر الورد معجوني
ومن ليل داجي رموش عينك حاك
وخلى العيون بسحر مسكوني
كيف بقدر يا بدر إنساك
وأغلب حواسي فيك خانوني
واحتار عقلي كيف راح بلقاك
وضمك بلهفة حب مشحوني
وصارو افكاري ينصبولي شراك
وتا نط فوق الحيط يغروني
وحيط الحديقة مسيج باشواك
وبعيد عني كتير هالشباك
وركاب ما عادوا يحملوني
…… من دفاتر اشعاري ..ابراهيم حمزة
ليست هناك تعليقات:
إرسال تعليق