قصيدة بالعامية اللبنانية بعنوان ( أجر السفر مدفوع ) كتبتها في رثاء زوجة صديق شاعر كنا نتشارك وإياه بعض الامسيات الشعرية وقد راح الشعراء يغدقون بالأوصاف على زوجته بأسلوب تقليدي مع أنهم لا يعرفون عنها شيئا وهذا برأيي ليس محببا
فقلت فيها بكل بساطة :
متل اللي كانوا حاملين شموع
وعطر المسا شي كان عم بيضوع
والليل ناصب خيمتو
هونيك ،
حد المدى الفضي
وكان القمر سهران
والصوت بيودي
وشاعر تكي مفجوع
يلملم افكارو تا يرحل
خلف البحور العنيدي
يدور على بيوت القصيدي
اللي حروفها من دموع
يودع شريكة عمر
يكتب بريشة من جمر
كلمات عا لوحة قبر
منها الصدى مسموع :
شمس العمر بعد الشباب
بتميل حتما للغياب
بترسم على حدود الشفق
لوحات سيجها القلق
وفيها اليأس مزروع
ما العمر نصفو. رجوع
منقطع زمان الغندرة
منمشي عا وقع الختيرة
والدرب تاخد لورا
ونزول بعد طلوع
ما العمر نصفو رجوع
وأجر السفر مدفوع
…… بقلمي ..ابراهيم حمزة
ليست هناك تعليقات:
إرسال تعليق