الوهم
مش عايز من حبك ادوق
خلاص من وهمك راح افوق
كنت كدبة عشقتها
ضحكت على صدقتها
كدبة كبرت جوه قلبي
وعنكبوتها غزل الخيوط
خيوطها خنقت وريدي
كأنها دراع اخطبوط
ليه سممتي في دمي
سمك كان سمه زعاف
ليه زودتي على همي
وبقيت من الحب بخاف
صدقيني كرهت قلبي
انه رق وحبك في مرة
انت وهم جه مستخبي
ولا انت حقيقة مرة
ياه على قسوة مرارك
وبرد وعتمة ديارك
جدار مغطيها الدموع
وهجرها ضي الشموع
صدقيني انا فوقت منك
لقيت خلاص ترياق لسمك
مش مهم الحب راح
مش مهم طعم الجراح
المهم القلب يعود
وتطرح فيه الورود
ما هو قلبي ومهما قاسى
بيرجع في الاخر ودود
يحيى حسين 8 فبراير 2019
ليست هناك تعليقات:
إرسال تعليق