(( ذكــريـــات ))
بقلم / عصام حسيني مدين
بقلم / عصام حسيني مدين
..............................................
كُنت شاب برئ وطيب
كُنت ساذج فِيا خير
كُنت شاعر قبل ما أكتب
كُـنت رســام للضمير
كُنت بحلم أبقي عاشق
وتقابلني سِـت حُسن
تبقا ليا أحـن حُضن
شُفت ياما عيون خدتني
دوبتني كُـنـت أجــــن
وأسهر الليل الطويل
وأبقي كالسكران وأزن
كنت بحلم بالمحبة
لبنت غاية في الجمال
فيها رقة ورد طارح من خيال
ليها وش كما الملايكة
والضفاير ليل طوال
والشفايف كالحريق
ليها قد مالوش مثال
كنت بحلم صدقوني
بالتفاهم بين روحين
مش جمال الوش هو
اللي شاغللني والعينين
أو أنوثة طاغية تأسر
أو جنون لمسة إيدين
كنت بحلم تبقي مصدر
للسعادة والمحبة والحنان
تبقي زي الأم تسند
لما أكون تعبان جبان
تبقي بنتي في الرواقة
وفي البراءة وفي الجنان
كنت بحلم صدقوني
بس حلمي في لحظة خان
مش هاطول بس هاحكي
القصة ليكوا باختصار
شُفت بنت جمالها بارع
نور منور كالنهار
بدر طالل ع المدينة
عطر واسع الانتشار
والعيون راسمين سفاين
رُحت جانن عقلي دار
قلبي دقدق جوه صدري
قولت هي كل عمري
هي ديَ أيوا ديَ الاختيار
والجواز قد تم حتما
والسعادة ليل نهار
بس عدي الوقت مني
شهر قول شهرين تلاتة
الغزال الحلو أصبح
وحش كاسر فيه تباتة
المشاعر فيها ماتت
والمحبة منها غابت
والعواطف لما شابت
جوا منها قولت أحاول
قَولت أجمَـَّع غنوه دابت
إلتقيت الصد قاسي
كنت ناسي إني باهت
وإني موضة قديمة خابت
وإن حلم الحُب في دنيا الخطايا
زيف مخيف وإن قلب الشُعرا طيف
كُنت ساذج لما فكرت إني قيس
وإن لَيلَي في عصر مادي مش نفيس
مستحيل حتكون في صفي أو ونيس
أو تكون في الدنيا واقع حيبادلني
العشق بالعشق النبيل
صدقوني عمري ما كنت في مشاعري
قيس بخيل
كنت مجنون والهوي جوا قلبي زي سيل
كنت بتودد إليها زي ضِل رقيق جميل
كنت شايلها في عيوني وقلبي شيل
عندي سؤال ومنايا ألقاله إجابة
هو ليه الحب يهرب بالجواز ؟
ليه بيوتنا من إزاز ؟؟
ليه برودة العالم بحاله تحل فينا
ليه بننسي كل حاجة حلوة لينا ؟
ليه حياتنا تخدنا منا وتعادينا ؟
هو لما الزوج يحاول يبقي عاشق
ولمراته يبقي شاعر يبقي عيب ؟
ويغازلها ويناديها ويحايلها ويداديها
و يعاكسها ولودادها يكون حبيب يبقي عيب ؟؟
صدقوني الكلمة غصة
قلبي متشوق لرقصة
بس هو الدبح جاير
قصة من مليون ألف قصة
هي حالتي حالة عامة ولا خاصة ؟؟
هو فيه كام ألف راجل زي ميت ؟؟
ماشي وبياكل ويشرب بس ميت .؟؟
قلبه متعود بينزف بس مش ممكن يصوَت
الصراخ م القلب عيب لما يبقي صاحبه راجل
علمونا م الطفولة البكا مش للرجال
البنات هي اللي تبكي والبكا صفة العيال
ليه بُكانا شئ مُعاب ما السحاب عمال بيبكي
والدموع تغسل تطهر م الرزايا في الفعال
علمونا حاجات بغيضة م الطفولة و جمدونا
لجموا إحساسنا فينا شوهوا فينا الجمال
يا كل ست وكل راجل دورا ع الحب فيكم
أوعي تنسي تحبي جوزك أو تسيبي هواه وحيد
وإنت اوعي تقول مشاغل الحياة واخداك بعيد
البيوت بالحُب تِعْمَرْ والدفا في البيت يحل
أما تشتيت العواطف والبلادة خراب أكيد
عمروا بالحُب دنياكم و خلوا كل ايد بتشد إيد
أحضنوا أحلامكو فيكو علموا اولادكو بيكوا
علموا أولادكو تكبر ع المحبة حبة حبة رح تزيد
دفوا أوصالكم بعاطفة ليها سحر
والمشاعر علموها تكون قريبة حتي لو كانت بعيد
..............................................
بقلمي / عصام حسيني مدين
مصر المحروسة
ليست هناك تعليقات:
إرسال تعليق